ಕನ್ನಡಕದ ಹಿಂದೆ..

ಕಪ್ಪು ಫ್ರೇಮಿನಂತಾ ರೆಪ್ಪೆಯ ಕೆಳಗೆ
ಆಸೆಯ ಕಡುಗಪ್ಪು ಕಣ್ಣು ಹೊರಳಿದಾಗ
ಹಾರುವ ಕೂದಲಿನ ಹರೆಯಕ್ಕೆ
ಐದು ಜೊತೆ ಕೈಬೆರಳ ಸ್ಪರ್ಷದ ಹಂಬಲ

                 ***

ಕೆನ್ನೆಗೆ ಕುರುಚಲು ಕಾಡಾಗುವ ತವಕ.
ಬ್ಲೇಡಿಗಾಗಲೇ ಕೆಲಸ ಮುಗಿಸಲು ಅಪ್ಪಣೆ ಸಿಕ್ಕು
ವಯ್ಯಾರಿಯ ಯೌವನ ಮರುಕಳಿಸಿ ನಕ್ಕಂತಾಗಿ
ಅಖಾಡಕ್ಕೆ ಇಳಿಯುವ ಎಲ್ಲಾ ಸೂಚನೆಯೂ ಇದೆ.

                 ***

ಪಕ್ಕದ ಮನೇಲಿ ಯಾವತ್ತೂ ಜಗಳ
ಬೆಂಕಿ ಹತ್ತುವಾಗಲೇ ಕರೆಂಟೂ ಹೊರಟು
ಗಂಡ ಪ್ರಾಣಿ ಮೂರು ದಿನ ನಾಪತ್ತೆ.
ಹೆಂಡತಿ ವಿರಹದುರಿಯಲ್ಲೇ ಅಡುಗೆ ಬೇಯಿಸುತ್ತಾಳೆ!
ಸಮಾಧಾನದ ಭೂತ ಬೆನ್ನು ಸವರಿ ಸಂತೈಸುತ್ತದೆ.

                 ***

ಸಂಜೆ ಹಾಲಿನ ಪಾತ್ರೆ ಉಕ್ಕಿ ಬಂದಿದೆ.
ಬಿಲದೊಳಗಿನ ಇಲಿ ಚಕ್ಕನೆ ಹೊರಬಿದ್ದು
ಬಾಗಿಲ ನಾಯಿ ಗುರುಗುಟ್ಟಿ ಸುಮ್ಮನಾಗುವಷ್ಟರಲ್ಲಿ
ಅಟ್ಟದ ಬೆಕ್ಕು ಮರಿಬಿಟ್ಟು ಕಾಲು ಸುತ್ತಿದೆ.
ಮೊನ್ನೆಯಷ್ಟೇ ಹುಟ್ಟಿದ ಕರು ಉರುಳು ಸಿಕ್ಕು ಸತ್ತಿದೆ.

                 ***

ಇತ್ತೀಚಿಗೆ ತಲೆನೋವು ಖಾಯಂ ಅತಿಥಿ
ಡಾಕ್ಟರು ಕನ್ನಡಕ ಬದಲಿಸಲು ಹೇಳುತ್ತಾರೆ.
ಈ ಡಾಕ್ಟರುಗಳೇ ಹಾಗಾ? ಅಂದುಕೊಂಡವನು
ಹೆಂಡತಿಯನ್ನೇ ಬದಲಿಸಲು ಯೋಚಿಸಿದ್ದಾನೆ
ಪಕ್ಕದ ಮನೆಯ ಸುಂದರಿ ಕಿಸಕ್ಕನೆ ನಕ್ಕಿದ್ದಾಳೆ